Fakturazio elektronikoaz asko hitz egin da azken urteetan, eta horrez gain, izapide asko elektronikoki egitera behartu gaituzte administrazio publiko ezberdinek autonomo eta enpresa guztiak. Kontuan izan behar diren bi kontzeptu azalduko dizkizuegu: alde batetik Izenpe txartela, eta bestetik, ef4ktur programa.

Orain artean fakturak paperean bidali izan dira posta tradizional bidez, baina, teknologiak aurrera egin duenetik digitalki bidaltzeko joera nagusitu da (emailez, bereziki). Hala ere, administrazio publikoarekin tratatu behar dugunean, ezin da emailez bidali dokumentazio fiskalik; zure izenean ala zure enpresaren izenean aurrez berretsitako txartel baten bidez sinatu behar dira dokumentuak eta fakturak.

Fakturazio elektronikoa: lehen urratsa

Izenpe txartela da Euskal Herrian elektronikoki sinadurak egiteko erabiltzen den txartelik ohikoena. Hau, Eusko Jaurlaritzak ematen du, eta horretarako zenbait urrats eman behar dira. Bere webgunean azaltzen ditu urrats horiek, eta esan bezala, administrazio publikoarekin egin behar dituzun operazioak egiteko beharrezkoa da:

  • Zergak aurkezteko ala kontsultatzeko
  • Ogasunaren aurrean aurkeztu behar dituzun ereduak aurkezteko ala kontsultatzeko
  • Gizarte segurantzaren online egoitzan sartzeko ala dokumentuak kontsultatzeko
  • Administrazio publikoren bati (udalak, foru aldundiak, jaurlaritza…) fakturak bidaltzeko

Eskatu aurretiko zita eta eraman webgunean agertzen den dokumentazio guztia. Zalantza teknikoa baduzu, galdegin emailez ala telefonoz aholkularitza teknikoa eskaintzen duen arloari.

Bigarren urratsa:

Behin txartela duzula, egoitza elektronikoan sartu ahal izango duzu. Bertan aukera ugari zabalduko zaizkizu hemendik aurrera eta denbora asko aurreztu ahal izango duzu edozein izapide egiteko. Dagoeneko ez baituzu pertsonalki joan beharko diru laguntzak eskatzera, zergak aurkeztera eta fakturak entregatzera.

Zalantza teknikoak badituzu, egoitza guztietan egoten da telefono bat zalantza horiek argituko dizkizun pertsona batekin.

Hirugarren urratsa:

Administrazio publikoren batekin harreman komertziala baduzu eta fakturak emititzen badituzu, Ef4ktur programa deskargatzea gomendatzen dizugu. Bertan, behin zure datuak konfiguratuta fakturak emititzen eta jasotzen hasi zaitezke. Fakturak bidaltzeko, beti, sinadura elektronikoa eskatuko dizu, eta esan bezala, hau, Izenpe txartelarekin eta berau aktibatzeko eskatuko dizun klabearekin osatuko duzu.

Hasieran teknologia berri hauek arrotzak egiten badira ere, ohitura hartuz gero, denbora aurrezten laguntzen digute. Beraz, administrazio publikoari fakturak egin beharrean bazaude ala egoitza elektronikoetan kudeaketak egin beharrean, gure gomendioa bi tresna hauek izatea da.

Fakturazio elektronikoa: zer eta nola?